3.9. EBAZPENA

450 batzarkide haiek ia beste 200 bat boto ordezkatu eman zituzten. Hasieran, irakasle batzuen ordezkariek beren idazki bat irakurri nahi izan zuten. Gai-zerrendan ez zegoen horrelakorik. Hala ere, gehiengo larri batek onartu egin zuen idazkia irakurtzea. Bertan esanak, ondoren bateratzeko proposatu zen idazkia onartzean ezabatu ziren. Azkenik, bozketa egin eta honako Batzorde hau osatu zen...

Batzorde horrek, bi aldeek zituzten Erakundetze-proiektuak aztertu eta Alkartasuna Ikasleen Gurasoen Kooperatiba eratu zuen berehala. OHO–BBB-UBI irakaskuntza-mailak osoro legeztatu zituen, ikastetxe berria eraiki zuen (Alkartasuna Lizeo berria) Andramendi baserriko lurretan eta berriro ere dena ibilbide normalera ekarri zuen. Eraikin berria finantzatzeko, betiko eta ohiko Seat 600aren zozketez eta aseguru-komisioen emariez harago joanda, kooperatibako guraso guztiek eta bazkide laguntzaileek, bakoitzak 15.000na pta.ko ekarpena egin zuten. Eskura ordaindu ez zutenek, mailegua atera ahal izan zuten Kutxaren batetik eta 5 urtetan zehar hileroko itzulketak eginez ordaindu zuten mailegua. Horretaz gainera, 1976-77 ikasturtean, batzordekide zen Josu Erguinek Ameriketatik ekarritako ideia bati gorputz emanez, KILOMETROAK 77 izeneko ospakizun erraldoia sortu zen Beasainen eta 1977ko urriaren 9an gauzatu zen lehenengo ekitaldia. 15.000 lagun ibili ziren zirkuituan lehen aldi hartan eta gaur egun Euskal Herri guztiko Ikastolek haren ildotik jarraitzen dute, urtean behin ospakizun erraldoiak eginez; Gipuzkoan KILOMETROAK (urrian), Bizkaian IBILALDIA (maiatzean), Araban ARABA EUSKARAZ (ekainean), Nafarroan NAFARROA OINEZ (urrian) eta Ipar Euskal Herrian HERRI-URRATS (maiatzean). 2001ean, Kilometroak jaiaren 25. edizioa zelako eta diru-premia izugarria zuelako, Beasaingo Ikastolak antolatu zuen Kilometroak 2001 jaia eta 120.000 lagun ibili ziren zirkuituan.